በቀን ውስጥ አብዛኛውን ጊዜ ተቀምጦ ማሳለፍ ቶሎ የመሞት እድልን ያፋጥናል- ጥናት

ለረጅም ሰዓታት መቀመጥ ለጤናችን ከፍተኛ ጉዳት እንዳለው በተለያዩ ጊዜያት የተሰሩ ጥናቶች ያመለክታሉ። የአሜሪካ ተመራማሪዎች ደግሞ በቅርቡ ባወጡት የጥናት ውጤት

በቀን ውስጥ ካለን ጊዜ ውስጥ አብዛኛውን ተቀምጠን የምንናሳልፍ ከሆነ ቶሎ የመሞት እድላችንን እንደሚያፈጥን አስታውቀዋል።

ለረጅም ሰዓት በምንቀመጥበት ጊዜ በየግማሽ ሰዓት ልዩነት እየተነሳን በእግራችን ዞር ዞር ካልን እና ከተንቀሳቀስን ግን ለሞት የመጋለጣችን እድል እንደሚቀንስም ነው ጥናቱ የሚያመለክተው።

በአሜሪካ ኒው ዮርክ የሚገኘው የኮሎምቢያ ዩኒቨርሲቲ የህክምና ማእከል የተሰራው ጥናት ቡድን መሪ የሆኑት ኬይት ዲያዝ፥ ይህ ጥናት በቀን ለተወሰነ ጊዜ አካላዊ እንቅስቃሴ ማድረግ (ስፖርት መስራት) ብቻ በቂ እንዳልሆነ ያሳያል” ብለዋል።

“የአካል ብቃት እንቅስቃሴ መስራት እንዳለ ሆኖ በተወሰነ ሰዓት ልዩነት ውስጥ በእግራችን መንቀሳቀስ እንዳለብን ልብ ልንል ይገባልም” ብለዋል።

ተመራማሪዎቹ እድሜያቸው 45 ዓመት እና ከዚያ በላይ ከሆኑ ከ7 ሺህ 985 ሰዎች ላይ መረጃ የወሰዱ ሲሆን፥ በሳምንት ወስጥ ምን ያክል እንቅስቃሴን እንደሚያደርጉም ጠይቀዋቸዋል።

ከእነዚህም ውስጥ 77 በመቶ ያክሉ ምንም አይነት እንቅስቃሴ ሳያደርጉ ለረጀም ሰዓት ተቀምጠው እንደሚሰሩ ነው በጥናቱ የተለየው።

ለአራት ዓመት በተካሄደው ጥናት ላይም በጥናቱ ወቅት ከተሳተፉት ሰዎች ውስጥ 340 ሰዎች መሞታቸውንም ነው ተመራማሪዎቹ ያስታወቁት።

ረጅም ጊዜን ሳንንቀሳቀስ በአንድ ቦታ የምናሳልፍ ከሆነ በጊዜ ሂደት ለሰውነት ከመጠን በላይ ውፍረት፣ ከመጠን ላለፈ የስብ ክምችት፣ ለስኳር በሽታ፣ ለልብ ህመም እና ለሞት የመጋለጥ እድላችን እየጨመረ ይመጣል የሚለውንም ተመራማሪዎቹ አስታውቀዋል።

አንድ የሚረዳን ነገር ቢኖር አላርም ወይም የማንቂያ ደውል ያላቸውን ሰዓቶች መጠቀም ነው የሚሉት ተመራማሪዎቹ፥ በዚህም በምን ሰዓት ተነስተን መንቀሳቀስ አለብን የሚለውን ከሞላን በኋላ አላርሙ ሲጮህ ለመንቀሳቀስ ይረዳናል ብለዋል።

ከዚህ በተጨማሪም ቢሮ ውስጥም ሆነ ለረጅም ጊዜ ተቀምጠን በምናሳለፍበት ስፍራ ላይ አካላችንን ለማንቀሳቀስ የሚረዳንን ነገር አስገብተን መጠቀምም መልካም ነው ተብሏል።

ምንጭ፦ www.reuters.com

Share this post

Submit to FacebookSubmit to Google PlusSubmit to StumbleuponSubmit to TechnoratiSubmit to TwitterSubmit to LinkedIn
Rate this item
(0 votes)

46589 comments

Leave a comment

Make sure you enter all the required information, indicated by an asterisk (*). HTML code is not allowed.

Information for All

Go to top